Kryeziu: 20 ministra për një vend të vogël si Kosova është burokraci dhe keqpërdorim i pushtetit

Drejtori i Institutit Demokratik të Kosovës (KDI), Ismet Kryeziu, ka reaguar ndaj propozimit të Albin Kurtit për formimin e një qeverie me 20 ministri, duke e cilësuar atë si shenjë të burokracisë dhe keqpërdorimit të pushtetit.

Sipas tij, përmasat e kabinetit të ri janë të pajustifikuara për një vend të vogël si Kosova. Ai gjithashtu ka ironizuar propozimin e Dimal Bashës për ministër, ndonëse ky i fundit është zgjedhur së fundi kryetar i Kuvendit.

“Në vitin 2025, të propozohet një kabinet qeveritar me 20 ministra për një vend të vogël si Kosova, me aq pak banorë sa kemi, nuk është reformë, është burokraci dhe keqpërdorim i pushtetit. E, hajgarja më e madhe është kur kryetari i Kuvendit, i zgjedhur vetëm para dhjetë dite, propozohet për ministër!?”, ka deklaruar Kryeziu.

Ai shtoi se kjo qasje tregon mungesë serioziteti nga Lëvizja Vetëvendosje dhe shfrytëzim të shumicës për interesa të pushtetit.

“Nëse kjo qasje e VV-së nuk tregon se edhe ky propozim i kabinetit është vazhdim i të njëjtës hajgare si me kryeparlamentarin, atëherë po tregon egon politike të pakufizuar, mungesën e respektit ndaj qytetarëve dhe joseriozitetin me të cilin ajo e trajton politikën dhe institucionet e shtetit. Ky është shembull klasik i keqpërdorimit të shumicës për pushtet, jo për shërbim publik e qeverisje më të mirë”, ka theksuar ai.