Kryeprokurori Gashi kërkon më shumë efikasitet dhe llogaridhënie nga prokuroritë

Kryeprokurori i Shtetit, Zejnulla Gashi, ka kërkuar ngritjen e efikasitetit, profesionalizmit dhe forcimin e llogaridhënies nga prokurorët gjatë vizitave zyrtare që ka zhvilluar sot në tri prokurori të vendit.

Gashi, i shoqëruar nga Zëvendëskryeprokurori i Shtetit, Bahri Hyseni, dhe drejtori i Përgjithshëm i Sekretariatit të Këshillit Prokurorial të Kosovës, Sami Istrefi, ka vizituar Prokurorinë e Apelit, Prokurorinë Speciale të Kosovës dhe Prokurorinë Themelore në Prishtinë.

Sipas njoftimit, qëllimi i këtyre vizitave ishte njohja nga afër me sfidat dhe vështirësitë me të cilat përballen prokurorët gjatë punës së përditshme, si dhe identifikimi i nevojave profesionale për të ofruar zgjidhje institucionale.

Gjatë takimeve, Kryeprokurori Gashi ka prezantuar edhe veprimet e ndërmarra që nga emërimi i tij në këtë pozitë, duke vënë theksin te krijimi i mekanizmave për përmirësimin e cilësisë së punës dhe forcimin e integritetit të prokurorëve.

Ai ka shprehur mbështetje të parezervë për prokurorët në ushtrimin e mandatit të tyre kushtetues dhe ligjor, por njëkohësisht ka kërkuar më shumë përgjegjësi dhe rezultate konkrete në punë.

Këto vizita janë pjesë e iniciativës së Kryeprokurorit të Shtetit për të vizituar të gjitha prokuroritë e Kosovës, me synim përmirësimin e funksionimit të sistemit prokurorial dhe forcimin e sundimit të ligjit.