Kryeministri i Sllovakisë, Robert Fico, ka marrë pjesë në tubimin parazgjedhor të listës “Aleksandar Vuçiq – Serbia e Bashkuar”, të mbajtur të enjten mbrëma në Novi Sad, ku i ka shprehur mbështetje kandidatit për kryeministër, Aleksandar Vuçiq, para zgjedhjeve që do të mbahen më 25 tetor.
Fico e nisi fjalimin në gjuhën serbe, duke thënë se ishte i lumtur që arriti të merrte pjesë në tubim, pavarësisht paralajmërimeve të mëhershme se nuk do të ishte i pranishëm për shkak të angazhimeve në samitin e Bashkimit Evropian (BE).
“Kur tha dikush se nuk do të vija? Ja ku jam, të dashur qytetarë të Novi Sadit dhe të Serbisë. Më erdhi shumë keq që nuk munda të isha në Beograd para dy javësh. Prandaj, i dërgova një mesazh mbështetjeje mikut tim Aleksandar, por tani dua ta shpreh këtë mbështetje personalisht, para jush”, ka thënë Fico.
Ai theksoi se nuk kishte ardhur për t’u treguar qytetarëve serbë se si duhet të votojnë, siç, sipas tij, bëjnë “disa të huaj të tjerë”.
Fico e lavdëroi Vuçiqin, duke e përshkruar si një lider me vizion të qartë për Serbinë dhe duke vlerësuar zhvillimin ekonomik të vendit nën udhëheqjen e tij.
“Zgjedhjet janë momenti kur ju vendosni nëse dëshironi që kjo të vazhdojë. Ju duhet të jeni një lider i vërtetë, një lider me shtyllë kurrizore. Është e rëndësishme të thuhet ‘jo’ kur të tjerët kërkojnë që të mendojmë dhe të veprojmë njësoj si ata”, ka deklaruar kryeministri sllovak.
Ai ka thënë se e mbështet Vuçiqin sepse, sipas tij, mbron sovranitetin e Serbisë dhe të drejtën e saj për të vendosur vetë. Fico kritikoi gjithashtu ato që i quajti qendra të jashtme të ndikimit, të cilat, sipas tij, dëshirojnë një Serbi më të dobët dhe i vendosin kushte të reja për anëtarësim në Bashkimin Evropian.
Kryeministri sllovak foli edhe për pozitën e pakicës kombëtare sllovake në Vojvodinë, duke falënderuar autoritetet serbe për trajtimin e bashkëkombësve të tij.
Në përfundim të fjalimit, Fico u ndal te qëndrimi i Sllovakisë për Kosovën, duke premtuar se vendi i tij do të vazhdojë ta mbështesë Serbinë në këtë çështje.
“Kur bëhet fjalë për Kosovën, nuk do t’ju zhgënjejmë kurrë. Gjithmonë do të keni tek unë një mik të vërtetë”, ka thënë Fico, duke u bërë thirrje qytetarëve serbë që të ruajnë paqen, stabilitetin dhe përparimin.
Sllovakia është një nga pesë shtetet anëtare të BE-së që nuk e njohin pavarësinë e Kosovës, krahas Spanjës, Qipros, Rumanisë dhe Greqisë
