Krasniqi kritikon qeverisjen Kurti, kërkon mbështetje në zgjedhjet e 28 dhjetorit: Ne jemi në krahun e popullit

Kandidati i AAK-së për deputet të Kuvendit, i cili garon me numër 23, Besnik Krasniqi ka kritikuar qeverisjen Kurti.

Krasniqi tha se qeverisja e tij solli përçarje, izolim dhe stagnim.

“Kosova, miq, ka nevojë për shërim të plagëve, ka nevojë për unitet, për partnerë të besueshëm dhe për fuqizim real ekonomik brenda vendit, si dhe për partneritet të fortë diplomatik jashtë tij. Me vite ju kemi paralajmëruar për keqqeverisjen e këtij klani politik që erdhi me fjalën “shpresë”, por solli përçarje, izolim dhe stagnim”, tha ai.

Me këtë rast, Krasniqi kujtoi rëndësinë e zgjedhjeve të 28 dhjetorit, duke i kërkuar qytetarëve mbështetjen e tyre.

“Sot jemi përballë një sfide të madhe më 28 Dhjetor. Nuk është thjesht datë zgjedhjesh, është provë përgjegjësie. Na duhet krahu juaj, sepse ne gjithmonë kemi qenë dhe jemi në krahun e popullit. As dje, as sot, e as nesër nuk kemi ndërruar anë. Ashtu siç kemi qenë gjithmonë, krah njerëzve, krah Kosovës.

Koha e fjalëve boshe ka kaluar. Tash është koha e vendimeve të drejta”, tha ai.