KQZ certifikon rezultatet për kryetar në 35 komuna, shpall ato për Prishtinë, Mamushë, Junik dhe për mbi 5 mijë asambleistë

Komisioni Qendror i Zgjedhjeve do të mbajë mbledhjen e radhës dhe rendi i ditës është i mbushur vetëm me rezultate të ndryshme që ky institucion do t’i shpall dhe certifikojë.

Në një njoftim dërguar mediave nga Zëdhënësi i KQZ-së, Valmir Elezi, bëhet e ditur se fillimisht KQZ do të shpall rezultatet përfundimtare nga zgjedhjet për Kryetarë të Komunave: Prishtinë, Mamushë dhe Junik. Këto tri komuna nuk ishin përfshirë në shpalljen e rezultateve më 25 tetor për shkak të ankesave që ishin në PZAP dhe Gjykatë Supreme.

Në vazhdim të mbledhjes, KQZ do të certifikojë rezultatet nga zgjedhjet për Kryetarë të 35 komunave, të cilat ishin shpallur në mbledhjen e muajit tetor.

Në këtë mbledhje, KQZ do të shpall edhe rezultatet përfundimtare të zgjedhjeve për 38 Kuvende Komunale. Numri i kandidatëve që janë certifikuar nga KQZ për këtë lloj të zgjedhjeve ishte 5,419 kandidatë, ndërkaq numri i ulëseve për të cilat është garuar është 942 në të gjithë vendin.

Ky është rendi i plotë për mbledhjen e sotme:

1. Hyrje: z. Kreshnik Radoniqi, Kryesues i mbledhjes së KQZ-së;

2. Shpallja e rezultateve përfundimtare të Zgjedhjeve Lokale në Republikën e Kosovës për Kryetar Komune të datës 12 tetor 2025, për komunat : Prishtinë , Junik dhe Mamushë;

3. Shpallja e rezultateve përfundimtare për Kuvendet Komunale për Zgjedhjet Lokale në Republikën e Kosovës të datës 12 tetor 2025;

4. Certifikimi i rezultateve për Zgjedhjet Lokale në Republikën e Kosovës, të datës 12 tetor 2025, për 35 komuna të Republikës së Kosovës;

5. Të ndryshme.