Shukri Buja, ka kritikuar deputetët e opozitës lidhur me zhvillimet e sotme në Kuvend dhe protestën kundër miratimit të ligjit për Dhomat e Specializuara.
Buja ka bërë një krahasim me vitin 1989, duke thënë se atëherë deputetët e Kosovës votuan për shuarjen e autonomisë, ndërsa sot, sipas tij, deputetët opozitarë nuk ndërmorën veprime për t’i penguar deputetët e pozitës që të qëndronin në Kuvend.
“Turp për deputetët e opozitës!”, ka shkruar Buja, duke shtuar se gjatë protestës ai dhe protestuesit u përballën me gaz lotsjellës dhe dhunë.
Postimi:
TURP PËR DEPUTETËT E OPOZITËS!
Si po përsëritet historia!
Në vitin 1989, deputetët e Krahinës Socialiste të Kosovës votuan për shuarjen e autonomisë dhe bashkimin me Serbinë, ndërsa arsyetoheshin se ishin të rrethuar me tanke.
E unë atëher bashkë me të rinjtë, isha në protesta, ku përballeshim me armë, gaz lotsjellës dhe dhunë të shfrenuar të milicisë.
Sot, deputetët opozitarë që plot gojën e kanë UÇK-në, nuk patën guxim t’ua mbyllnin dyert deputetëve të pozitës që nuk e përkrahën ligjin në leximin e parë, që të mos qëndronin në Kuvend deri në leximin e dytë.
As dyert nuk ua mbyllën, as ujë nuk u hodhën!
Ndërsa unë sot, bashkë me protestuesit, duke u përpjekur t’i pengonim deputetët të qëndronin në Kuvend për ta votuar ligjin për Dhomat e Specializuara në leximin e dytë, u përballëm me gaz lotsjellës dhe dhunë.
Mos dilni sot të defiloni e të filozofoni, ju deputetë të opozitës, sikur dikur deputetët e Krahinës!
Historia nuk matet me fjalë. Historia matet me qëndrimin kur vjen momenti për të vepruar.
