Kolektivi për Mendim dhe Veprim Feminist ka reaguar pas vdekjes së 27 vjeçarit nga Lipjani.
“Brutaliteti është qenësor në ekzistencën dhe funksionin e policisë. Ndërveprimi përmes dhunës, frikësimit, dehumanizimit, shqetësimit e tentativës për kontroll është rutinore për shumë prej nesh që ndeshemi me këtë institucion”, thuhet në reagim.
Reagimi i plotë:
Parëmbrëmë, disa policë e arrestuan dhunshëm dhe e vranë Agon Zejnullahun në mes të Lipjanit. Brutaliteti policor që e la pa frymë Agonin nuk ishte shpërdorim i izoluar i forcës dhe pushtetit, por një normë e cila e përshkon raportin që institucioni i policisë ka krijuar me civilët/et. Brutaliteti është qenësor në ekzistencën dhe funksionin e policisë. Ndërveprimi përmes dhunës, frikësimit, dehumanizimit, shqetësimit e tentativës për kontroll është rutinore për shumë prej nesh që ndeshemi me këtë institucion.
Ndonëse konteksti historik i krijimit të policisë shtetërore të pavarur nga kolonializmi dhe okupimi jugosllavo-serb e ka ndërtuar një raport specifik të shoqërisë tonë me policinë, ajo nuk e ka tjetërsuar funksionin e saj kyç -ruajtja e interesave të klasës sunduese përmes forcës. Duke qenë kështu, policia si institucion është dëshmuar të jetë shpesh dhunues i atyre që kërkojnë ndihmë, i grupeve më të cenueshme shoqërore dhe i atyre që i kundërvihen padrejtësive shtetërore.
Megjithatë, ekspozimi tronditës i kësaj dhune që la të vrarë Agon Zejnullahun përveç që pahëson natyrën e dhunshme të policisë, është edhe një moment kritik për ndërgjegjen kolektive. Vrasja e tij, tashmë e regjistruar edhe vizualisht në kujtesën tonë, duhet të na bëjë të lëvizim, të organizohemi dhe t’i kundërvihemi dhunës e cila asnjëherë nuk është e rastësishme dhe e izoluar. Thërrasim në mobilizim shoqëror për siguri të gjithësecilës e secilit prej nesh, dhe për të kërkuar drejtësi post-mortum për Agonin.
