Klithma” shfaqet sonte në Prishtinë në kuadër të konferencës për krimet e luftës

Në kuadër të konferencës ndërkombëtare të organizuar nga Instituti për Krimet e Kryera gjatë Luftës në Kosovë, sonte në kinemanë Armata në Prishtinë do të shfaqet filmi artistik “Klithma”, me regji të Korab Lecajt.

Filmi trajton traumën psikologjike të burrave shqiptarë që gjatë luftës në Kosovë ishin viktima të dhunës seksuale, një temë e ndjeshme dhe pak e trajtuar në kinematografinë vendore. Përmes një narrative të fuqishme dhe qasjeje intime, vepra synon të hapë debat publik mbi plagët e heshtura të luftës dhe sfidat e mbijetesës pas traumës.

“Klithma” deri më tani ka fituar pesë çmime ndërkombëtare në festivale të ndryshme filmi, duke u vlerësuar për trajtimin artistik, interpretimin dhe guximin tematik. Filmi është mbështetur nga Qendra Kinematografike e Kosovës.

Pas shfaqjes do të mbahet një diskutim i hapur me publikun, ku do të marrë pjesë regjisori Korab Lecaj. Diskutimi pritet të fokusohet në procesin krijues të filmit, sfidat në trajtimin e një teme kaq të ndjeshme, si dhe në rëndësinë e adresimit të traumave të mbetura nga lufta përmes artit dhe debatit publik.