Pas rastit tragjik të vrasjes së një gruaje 25-vjeçare shtatzënë në fshatin Kërvasari të Malishevës, Ministrja në detyrë e Drejtësisë, njëherësh Koordinatorja Kombëtare kundër Dhunës në Familje, Dhunës ndaj Grave dhe Dhunës me Bazë Gjinore, Donika Gërvalla, ka zhvilluar takim me përfaqësues të Policisë së Kosovës, Prokurorisë, Gjykatës dhe Qendrës për Punë Sociale.
Siç bëhet e ditur në komunikatën për media, takimi kishte për qëllim shqyrtimin e funksionimit të mekanizmave institucionalë dhe identifikimin e masave të nevojshme për parandalimin e rasteve të dhunës.
“Rastet e tilla na obligojnë të ndalemi, të shohim me përgjegjësi të plotë funksionimin e mekanizmave institucionalë dhe të bëjmë gjithçka që është e mundur për të parandaluar përsëritjen e tyre. Por çdo jetë e humbur na obligon të bëjmë më shumë, shumë më herët, të bëjmë gjithçka që kemi në dorë për të parandaluar rastin tjetër”, deklaroi Gërvalla.
Ajo theksoi se parandalimi i dhunës kërkon bashkëpunim dhe përgjegjësi të plotë nga të gjitha institucionet.
“Parandalimi kërkon vigjilencë, përgjegjësi dhe bashkëpunim të plotë mes institucioneve. Secili duhet të jetë në nivelin e detyrës, të veprojë me kohë dhe të mos lejojë asnjë hallkë e sistemit të dështojë”, u shpreh ajo.
Sipas informacioneve të institucioneve përgjegjëse, bashkëshorti i viktimës dyshohet për përfshirjen në rast, ndërsa viktima, bazuar në të dhënat e deritanishme, nuk rezulton të ketë qenë më parë e evidentuar në ndonjë situatë që do të sinjalizonte një rrezik të tillë.
