Kelmendi për çmimet e nderit: Kur humb marrja, gjithçka bëhet normalitet

Gazetari Adriatik Kelmendi u shpreh i befasuar dhe tha se nuk mund ta besonte që Universiteti i Prishtinës u ndau çmime nderi dyshes që aktualisht udhëheq Kosovën.

Kelmedni tha se nuk arriti të besojë që nga mijëra studentë të UP-së që janë zhvilluar dhe kanë pasur të arritura të mëdha, pikërisht dy pushtetarëve t’u jepen çmime nderi.

“Kur e pashë titullin diku si shakarazi, nuk e mora seriozisht. Thashë, edhe një lajm i rremë! S’ka mundësi që Universiteti i Prishtinës, në mesin e mija e mija studentëve që janë zhvilluar në personalitete me ndikim e nderim, t’u ndajë tituj nderi pikërisht politikanëve të një stine politike!”, tha ai.

Për më tepër, Kelmendi tha se është e pabesueshme që Vjosa Osmani dhe Albin Kurti i pranuan këto çmime.

“S’ka mundësi që, edhe nëse dikujt t’i ketë shkuar mendja ta bëjë këtë marrëzi, që Albin Kurti e Vjosa Osmani do ta pranojnë. Fatkeqësisht e mjerisht, të dyja të vërteta. Edhe dikush doli aq poltron sa t’i laureojë pushtetarët kryesorë dhe, edhe më keq, këta të pranojnë”, shkroi më tej Kelmendi.

Krejt ngjarja ishte e pabesueshme për Kelmendin, i cili tha se si duket ka humbur ‘marrja’ për çdo veprim dhe tashmë çdo gjë që ndodh në këtë vend është bërë normale.