KEK-u para pak çastesh ka njoftuar se blloku A3 i TC Kosova A ka dalë jashtë sistemit.
Kjo u konfirmua edhe në të dhënat e publikuara të gjenerimit “live” nga TC Kosova A.
KEK tha se dalja e A3 nga prodhimi është situatë e përkohshme, teksa shtoi se situata me prodhim energjie është e qëndrueshme.
“Ekipet profesionale dhe teknike të KEK sh.a. janë duke realizuar verifikimet dhe kontrollimet e nevojshme për të identifikuar shkakun dhe për të ndërmarrë masat e duhura për sanimin e situatës, në përputhje me procedurat teknike operative”, u tha në njoftimin e KEK-ut.
Korporata tha se operimi i sistemit elektroenergjetik po vazhdon në mënyrë të qëndrueshme dhe të kontrolluar, pasi aktualisht po operon me katër njësi gjeneruese: A4, A5, B1 dhe B2, “në përputhje me planin e prodhimit dhe bilancin energjetik të aprovuar”.
“Njësia e pestë aktivizohet sipas nevojës dhe parametrave teknikë, me qëllim të adresimit të rritjes së konsumit, pa cenuar stabilitetin dhe sigurinë operative”, tha KEK-u.
