Kadetët e FSK-së përfundojnë me sukses garën “Triumfi Dardan 2025”

Kadetët e Qendrës për Studime Universitare (QSU) kanë përfunduar me sukses patrullën ushtarake “Triumfi Dardan 2025”, një garë që organizohet çdo vit në kushte të vështira terreni, me qëllim testimin e aftësive fizike, mendore dhe taktike të pjesëmarrësve.

Sipas njoftimit të Forcës së Sigurisë së Kosovës, në këtë garë kanë marrë pjesë gjithsej 27 kadetë, të ndarë në tri skuadra, ndërsa vëmendje e veçantë i është kushtuar pjesëmarrjes së skuadrës nga Akademia Ushtarake e Turqisë.

“Pjesëmarrja e tyre përbën një shembull të shkëlqyer të bashkëpunimit ushtarak mes Kosovës dhe Turqisë, duke forcuar miqësinë dhe shkëmbimin e përvojave profesionale ndërmjet dy ushtrive mike”, thuhet në njoftim.

Ky aktivitet, sipas FSK-së, jo vetëm që ka forcuar lidhjet ushtarake ndërmjet institucioneve arsimore të dy vendeve, por ka dëshmuar se sfidat e përbashkëta ndërtojnë miqësi të qëndrueshme dhe profesionalizëm të përbashkët.

Në përfundim të patrullës, të gjithë kadetët – përfshirë ata nga Akademia Ushtarake e Turqisë – janë vlerësuar për përkushtimin, vendosmërinë dhe shpirtin luftarak që treguan gjatë gjithë garës.