Inspektorati Qendror i Mbikëqyrjes së Tregut (IQMT), në kuadër të Ministrisë së Industrisë, Ndërmarrësisë dhe Tregtisë (MINT), ka intensifikuar kontrollet në treg me rastin e fillimit të sezonit pranveror, me qëllim garantimin e sigurisë së produkteve dhe mbrojtjen e konsumatorëve.
Sipas një komunikate, fokusi i inspektimeve ka qenë tek produktet e makinerisë, pajisjet personale mbrojtëse, lodrat për fëmijë dhe produkte të tjera që paraqesin rrezik potencial për shëndetin dhe sigurinë, shkruan Gazeta Online Reporteri.net.
“Si rezultat i inspektimeve në terren, janë identifikuar dhe larguar nga tregu një numër produktesh të pasigurta për përdorim, të cilat janë sekuestruar në përputhje me legjislacionin në fuqi”, thuhet në njoftim.
Sipas IQMT-së, arsyet kryesore të konfiskimit kanë qenë mungesa e dokumentacionit teknik përkatës dhe tejkalimi i afatit të përdorimit.