Inspektorati Qendror i Punës ka marrë vendim për ndalimin e përkohshëm të punimeve në tri objekte ndërtimi në komunën e Prizrenit.
Sipas njoftimit të Inspektoratit, gjatë inspektimeve në terren janë konstatuar parregullsi në zbatimin e masave për sigurinë dhe shëndetin e punëtorëve.
Si pasojë e këtyre shkeljeve, është vendosur që punimet në këto tri objekte të ndërpriten deri në eliminimin e plotë të parregullsive dhe krijimin e kushteve të sigurta për punë.
Inspektorati Qendror i Punës u ka bërë thirrje të gjithë punëdhënësve që të respektojnë legjislacionin në fuqi dhe të ndërmarrin masat e nevojshme për garantimin e sigurisë dhe shëndetit të punëtorëve në vendin e punës.
