Imri Ahmeti dhe Dega e tij kërkojnë dorëheqjen e Lumir Abdixhikut nga kryetari i LDK-së

Pas Degës në Pejë, edhe LDK në Lipjan në krye me Imri Ahmetin, ka kërkuar dorëheqjen e Lumir Abdixhikut si Kryetar i LDK’së, pas rezultatit të 7 qershorit, shkruan Reporteri.net.

Në reagim thuhet se Kryesia e Degës kërkon dorëheqjen e Abdixhikut, si standard të përgjegjësisë politike dhe si akt reflektimi ndaj mesazhit që qytetarët kanë përcjellë përmes votës së tyre.

“Në këtë frymë, pas një diskutimi të gjatë dhe një analize të detajuar të secilës qendër votimi në Degën e Lipjanit, si dhe të gjendjes aktuale politike dhe organizative brenda Lidhjes Demokratike të Kosovës, Kryesia e Degës kërkon dorëheqjen e Kryetarit të LDK-së, si standard të përgjegjësisë politike dhe si akt reflektimi ndaj mesazhit që qytetarët kanë përcjellë përmes votës së tyre”, thuhet në reagim.

Kryesia e Degës së LDK-së në Lipjan, në mbledhjen e mbajtur së bashku me kryetarët e nëndegëve, shpreh mirënjohjen dhe falënderimin e sinqertë për të gjitha strukturat e degës, aktivistët dhe anëtarësinë për angazhimin, përkushtimin dhe mbështetjen e dhënë gjatë procesit zgjedhor. Po ashtu, falënderojmë qytetarët e Komunës së Lipjanit për pjesëmarrjen dhe kontributin e tyre në zhvillimin e një procesi zgjedhor demokratik, të qetë dhe dinjitoz.

Në vazhdim të mbledhjes, Kryesia e Degës, së bashku me kryetarët e nëndegëve, ka analizuar rezultatin e zgjedhjeve të fundit në degën tonë.

Ndonëse vota për LDK-në në degën tonë është pothuajse e përsëritur në raport me zgjedhjet e dhjetorit 2025, duke kaluar nga 6,338 vota apo 19.40% në zgjedhjet e dhjetorit në 6,455 vota apo 23.60% në zgjedhjet e qershorit 2026, Kryesia e Degës së LDK-së në Lipjan vlerëson se ky rezultat mbetet larg pritjeve dhe angazhimit të madh të strukturave të degës.

Kryesia e Degës vlerëson se rezultati i zgjedhjeve të përgjithshme në nivel vendi nuk mund t’u atribuohet vetëm strukturave lokale. Ai paraqet edhe një reflektim të gjendjes, organizimit, funksionimit dhe kapacitetit politik të partisë në nivel qendror; prandaj, përgjegjësia për rezultatin duhet të shihet në mënyrë të balancuar në të gjitha nivelet e organizimit partiak.

Rezultati i zgjedhjeve duhet të shërbejë si thirrje për reflektim, përgjegjësi të përbashkët dhe nisjen e procesit të reformimit dhe riorganizimit të partisë në të gjitha nivelet.

Vetëm përmes reflektimit të sinqertë, debatit të hapur dhe llogaridhënies në të gjitha nivelet mund të rikthehen besimi dhe energjia.

Në këtë frymë, pas një diskutimi të gjatë dhe një analize të detajuar të secilës qendër votimi në Degën e Lipjanit, si dhe të gjendjes aktuale politike dhe organizative brenda Lidhjes Demokratike të Kosovës, Kryesia e Degës kërkon dorëheqjen e Kryetarit të LDK-së, si standard të përgjegjësisë politike dhe si akt reflektimi ndaj mesazhit që qytetarët kanë përcjellë përmes votës së tyre.

LDK në Lipjan mbetet një degë e konsoliduar, e cila ka shënuar fitore në katër palë zgjedhje lokale radhazi, ndërsa tri herë ka fituar pa balotazh dhe pa pasur nevojë për koalicione. Kjo dëshmon mbështetjen e qëndrueshme qytetare dhe kapacitetin organizativ të degës.

Vetëm përmes debatit të hapur, llogaridhënies dhe reformimit të brendshëm, LDK-ja mund të rikthejë besimin dhe ambicien për të qenë forcë udhëheqëse në vend.