I jepet lamtumira e fundit veteranit të UÇK-së, Faik Dodaj – përcillet me nderime ushtarake

I është dhanë lamtumira e fundit aktivistit të hershëm, veteranit të arsimit, komandantit dhe veteranit të Luftës së UÇK-së në Baballoq, Prof. Faik Dodaj.

Përcjelja e tij është bërë me nderime ushtarake nga Forca e Sigurisë së Kosovës, sot në vendlindjen e tij, në praninë e shumë bashkëluftëtarëve, komandantëve të luftës së UÇK-së, familjarëve dhe qytetarëve.

Siç njoftoi OVL-UÇK në Deçan, në Akademinë Komemorative të organizuar sot, ndër të tjera u tha se Prof. Faik Dodaj edukoi breza të rinj me atdhedashuri, duke i frymëzuar për qëndresë ndaj pushtuesit.

“Edhe vetë u rreshtua në Ushtrinë Çlirimtare të Kosovës, së bashku me shumë të rinj, ndër ta edhe ish-nxënës të tij. Pas luftës, vazhdoi misionin e shtetndërtimit, duke dëshmuar përkushtim, përgjegjësi dhe nivel të lartë profesional në çdo detyrë që mori përsipër.

Komandant Faik, nga sot do t’i mungosh rreshtit të gjatë të bashkëluftëtarëve me të cilët rrugëtove në ditët më të vështira të luftës dhe në rrugën e shtetndërtimit”, thuhet në njoftim.