I dobët, por i buzëqeshur, Nicolas Maduro publikon fotot nga burgu në Amerikë

Nicolas Maduro ka publikuar fotografi të reja nga burgu në Shtetet e Bashkuara, ku shfaqet duke buzëqeshur dhe duke bërë me dorë shenjën e paqes.

Në fotografitë e publikuara, ish-presidenti venezuelian shfaqet i veshur me një kostum sportiv gri burgu dhe atlete Nike. Ai mban syzet në njërën dorë, ndërsa me tjetrën bën shenjën e paqes përpara kamerës.

Maduro tha se fotografitë po i dërgonte si “një dhuratë të vogël” për nipërit dhe mbesat e tij, si dhe për fëmijët dhe njerëzit që i duan.

“Po i dërgoj këto fotografi si një dhuratë të vogël për të gjithë nipërit e mbesat e mia, për djemtë dhe vajzat dhe për të gjithë njerëzit e mirë që na duan”, shkroi ai.

Maduro, 63 vjeç, ndodhet në paraburgim në SHBA, ndërsa ndaj tij janë ngritur akuza për trafik droge. Edhe bashkëshortja e tij, Cilia Flores, 69 vjeçe, ndodhet në të njëjtin institucion dënimi në Nju Jork.

Fotografitë e reja kanë tërhequr vëmendje për pamjen e tij, pasi Maduro duket më i dobët, por në imazhe shfaqet në gjendje të qetë dhe duke buzëqeshur.