Raportohet se i arrestuari për korrupsion është djali i drejtorit komunal në Vushtrri

Janë mësuar detaje të reja lidhur me arrestimin e zyrtarit të Ministrisë së Mjedisit, Planifikimit Hapësinor dhe Infrastrukturës, Fatos Ferizi, i cili dyshohet për korrupsion në procesin e testimit të kandidatëve për patentë-shofer.

Burimet e Sinjalit bëjnë të ditur se i arrestuari, Fatos Ferizi, rreth 40-vjeçar, me pozitë si ekzaminer i pjesës teorike në MMPHI, është djali i Maliq Ferizit, drejtor për Emergjenca në Komunën e Vushtrrisë.

Në foto Maliq Ferizi, drejtori për Emergjenca në Komunën e Vushtrrisë dhe Ferit Idrizi, kryetari i Vushtrrisë

Siç u raportua më herët, Ferizi u arrestua së bashku me një instruktor të autoshkollës “Stop” në Prishtinë, pasi u kapën me ryshfet prej 850 eurosh për kalimin e testit teorik të patentë-shoferit.

Ndaj tyre po zhvillohen procedurat përkatëse nën drejtimin e Prokurorisë, ndërsa hetimet lidhur me këtë rast janë duke vazhduar.