Kryetari i Aleancës për Ardhmërinë e Kosovës (AAK), Ramush Haradinaj, ka lënë të kuptohet se vendi mund të shkojë në zgjedhje të parakohshme parlamentare në muajin dhjetor të këtij viti.
Në një adresim drejtuar diasporës përmes rrjeteve sociale, Haradinaj ka falënderuar bashkatdhetarët për angazhimin e tyre në proceset zgjedhore, duke i ftuar që të jenë aktivë edhe në raundin e dytë të zgjedhjeve komunale që do të mbahen më 9 nëntor.
“Të nderuar kolegë nga Diaspora,
E di se shumë prej jush jeni angazhuar shumë, si për zgjedhjet parlamentare në shkurt, ashtu edhe për zgjedhjet komunale tani. Keni votuar në Diasporë, keni kontaktuar familjarët tuaj dhe miqtë, dhe keni ardhur në Kosovë për ta përkrahur Aleancën.
Besnikëria juaj është e rrallë, qëndruat me ne gjatë të gjitha sfidave. Haga 1, Haga 2 e sfidat e tjera, dhe nuk na latë asnjëherë vetëm, ashtu sikurse nuk e latë vetëm Kosovën në luftën e UÇK-së.
Faleminderit nga zemra juve dhe familjeve tuaja!
Më 9 nëntor mbahen zgjedhjet në balotazh për komunat e Kosovës. Mos e neglizhoni rëndësinë e ditës së balotazhit, votoni prej atje nëse mundeni, komunikoni me familjet dhe të njohurit tuaj në Kosovë, apo ejani edhe njëherë e votoni në Kosovë.
Në dhjetor mund të mbahen edhe zgjedhjet parlamentare. Aleanca po rikthehet fuqishëm falë edhe juve, falë angazhimit të Diasporës.
Të vazhdojmë të bashkuar si asnjëherë më parë, sepse Kosova na thërret”, ka shkruar Haradinaj në Facebook.
Ky paralajmërim i Haradinajt për zgjedhje të reja parlamentare vjen vetëm pak ditë pas mandatimit të Albin Kurtit nga presidentja Vjosa Osmani për formimin e Qeverisë së re.
Megjithatë, me vetëm 48 ulëse të fituara në Kuvend, Lëvizjes Vetëvendosje i duhen edhe 13 vota për të siguruar shumicën e nevojshme prej 61 deputetësh.
Kryeministri në detyrë, Albin Kurti, ka paralajmëruar se gjatë kësaj jave do të nisë bisedimet me partitë politike për formimin e qeverisë, por nuk ka dhënë detaje për partnerët e mundshëm të koalicionit.
