Kryetari i Aleancës për Ardhmërinë e Kosovës, Ramush Haradinaj, ka kritikuar ashpër vendimin e Zyrës së Rregullatorit të Energjisë për kalimin në tregun e lirë të energjisë elektrike për bizneset vendore, duke thënë se Albin Kurti i ka lënë bizneset në dorën e “mafisë energjetike”.
Në një postim në Facebook, Haradinaj ka paralajmëruar se personat përgjegjës për dëmet që po i shkaktohen vendit përmes liberalizimit të tregut energjetik do të përballen me ligjin.
“Zaptuesi i Zyrës së Kryeministrit së bashku me vartësit e tij, i la bizneset e Kosovës në mëshirë të mafias energjetike, në mënyre arbitrare dhe me qëllim të qartë tashmë, çmontimin e Kosovës duke ua trashur xhepat të dëgjueshmëve të tij”, tha Haradinaj.
Ai paralajmëron se ky veprim “shkatërrues” nuk do të kalojë pa përgjegjësi: “Ky veprim shkatërrues nuk do të kalojë pa përgjegjësi. Rrethi po ju ngushtohet çdo ditë, dhe ky fund nuk do të jetë i mirë për ta, pashmangshëm do të përballen me ligjin. Kosova ka me u liru nga këta gangasterë me agjenda të dyshimta”.
