Grupi Punues që do të hartojë “strategjinë shtetërore” për procesin e Apelit në Hagë, kjo është përmbajtja

Qeveria e Kosovës ka marrë vendim për themelimin e një grupi punues që do të hartojë strategjinë shtetërore lidhur me procedurat e apelit në Gjykatën Speciale.

Sipas dokumentit të datës 14 tetor, grupi do të drejtohet nga zëvendëskryeministri i parë dhe ministri i Jashtëm, Glauk Konjufca.

Vendimi parashikon bashkërendimin e veprimeve institucionale dhe diplomatike për mbështetjen e proceseve gjyqësore dhe dokumentimin e luftës çlirimtare të Kosovës.

“Themelohet Grupi Punues për hartimin dhe harmonizimin e Strategjisë Shtetërore lidhur me procedurat e Apelit para Dhomave të Specializuara në Hagë”, thuhet në dokument.

Në këtë grup parashikohet pjesëmarrja e përfaqësuesve të Qeverisë, Presidencës, Kuvendit dhe partive parlamentare, përfshirë VV-në, PDK-në, LDK-në dhe AAK-në.

Një ndër detyrat kryesore është bashkëpunimi me ekipet mbrojtëse të të akuzuarve në Hagë.

Grupi do të identifikojë nevojat për dokumentacion, ekspertizë profesionale dhe mbështetje institucionale, duke respektuar pavarësinë e ekipeve mbrojtëse.

Po ashtu, parashikohet shqyrtimi i çështjeve që lidhen me të drejtat themelore dhe standardet e gjykimit të drejtë.

Dokumenti kërkon edhe analizimin e aktgjykimeve të Tribunalit të Hagës për krimet e kryera nga Serbia në Kosovë gjatë viteve 1998–1999.

Synimi është që këto materiale të shërbejnë për dokumentimin e së vërtetës historike dhe, sipas nevojës, t’u ofrohen ekipeve mbrojtëse.

“Grupi Punues, brenda tridhjetë (30) ditëve nga konstituimi, harton propozimin fillestar të Strategjisë Shtetërore dhe planin e veprimit”, përcakton vendimi.

Mandati i grupit do të jetë gjashtë muaj, me mundësi vazhdimi.

Konjufca dhe anëtarët e tjerë do të kenë gjithashtu detyrimin ta informojnë kryeministrin Albin Kurti për aktivitetet e tyre të paktën një herë në muaj.

Dokumenti parashikon që vendimi të hyjë në fuqi pas publikimit në Gazetën Zyrtare.