Deputeti i Partisë Demokratike të Kosovës, Përparim Gruda, tha se partia e tij ka vendosur të mos mbështesë kandidaturën e Glauk Konjufcës dhe asnjë kandidaturë tjetër partiake për president.
Ai deklaroi se nuk do të marrin pjesë në seanca dhe se, sipas tij, po përgatitet që seancat të mos mbahen fare.
Sipas Grudës, mosmbajtja e seancës për zgjedhjen e presidentit përbën shkelje të Kushtetutës dhe përmbysje të rendit kushtetues.
“Ne kemi vendosur që mos të mbështesim kandidaturën e Glauk Konjufcës, asnjë kandidaturë tjetër partiake. Është qëndrim i qartë edhe nuk do të marrim pjesë në seancat. Por ajo që po përgatitet është mos me u mbajt seancat fare si e kuptoj unë, është përmbysje e rendit kushtetues. Sepse sot Kuvendi u desh me u mbledh, me zgjedh ose mos me zgjedh një president. Po kjo që as mos me e zgjedh, as mos me e konsumuar procedurën, është shkelje e Kushtetutës edhe po bëhet me qëllim me përmbys rendin kushtetues, me ja nënshtru krejt rendin kushtetues vullnetit të një partie politike”, tha ai.
Gruda tha se situata aktuale është “tallje me Kosovën”, duke theksuar se Lëvizja Vetëvendosje ka fituar 51 për qind të votave dhe jo 100 për qind.
Sipas tij, me këtë rezultat zgjedhor partia ka mundur të formojë qeverinë dhe institucionet, por jo edhe të zgjedhë e vetme presidentin.
Ai shtoi se partitë duhet të ulen dhe të gjejnë një emër të përbashkët për president, duke e quajtur situatën aktuale papërgjegjësi ndaj Kosovës dhe qytetarëve.
“Besoj është tallje me krejt Kosovën, sepse rezultati dihet. E vërteta është se ne i kemi vetëm 22 deputetë. Por është edhe një e vërtetë e madhe populli i Kosovës e ka votu 51% Vetëvendosjen, jo 100%, a ashtu? 51%. Me 51% ata kanë mujt me formu qeverinë, me formu kuvendin, me miratu Ligjin për buxhetin e gjëra të tjera, por jo edhe me bë president. Prandaj duhet me u sjell në përputhje me rezultatin zgjedhor. Ky rezultat zgjedhor na ka imponu që të tona me u ulë e me gjet një emër për president. Kjo është e vërteta. Po krejt partitë populiste në botë, në fakt, kur fitojnë 51% e llogarisin sikur kanë fitu 100%, sillemi si 100%. Ajo është komplet tallje me Kosovën, me Kushtetutën, me interesat e qytetarëve të Kosovës. Është papërgjegjësi e pashembullt në Kosovën e pavarur”, deklaroi Gruda.
