Grabitja e argjendarisë në Kamëz, dalin pamjet – njëri prej autorëve rrëzohet, tjetri e gjuan në kokë

Grabitja e kryer në Kamëz nga dy persona të maskuar që lëviznin me motor vijon të prodhojë lajm, teksa janë zbuluar të reja në lidhje me të.

TopChannel ka arritur të sigurojë videon e momentit të hyrjes së grabitësve në argjendari.

Në çastin kur dyshja tenton të futet njëri rrëshqet në pllaka dhe rrëzohet, teksa partneri në krim e godet si për ta kritikuar të ketë kujdes, një skenë si e “huazuar” nga filmat komik.

Kjo e Kamzës është një nga grabitjet më me shumë dëme në kohët e fundit, ndërsa pronarët kanë raportuar se janë marrë mbi 70 milionë leke bizhuteri. Ai nuk e drejton gishtin tek askush, pasi shprehet se nuk ka konflikte dhe nuk mendon se mund t’i njohë autorët.

Policia e Tiranës ka shoqëruar disa persona me precedent të mëparshëm penal në zonën e Kamzës për të cilët po kryen verifikime nëse kanë lidhje me grabitjen.

Nga kontrollet dhe shoqërimet e kryera deri më tani autoritetet nuk kanë mundur dot të shkojnë tek emrat e autorëve, por falë kamerave të sigurisë është mësuar itinerari i tyre.

Autorët të cilët në çdo sekuencë filmike të sekuestruar paraqiten të maskuar pas grabitjes kanë vijuar lëvizjen e tyre drejt Zallherrit. Mandej në një moment ata pësojnë një rrëshqitje me motor dhe rrëzohen, për ta vijuar sërish lëvizjen dhe për t’u arratisur pa gjurmë.