Gjuajti me AK-47 në dasmë, arrestohet 54-vjeçari në Lipjan

Policia të mërkurën ka arrestuar një 54-vjeçar në fshatin Medvec të Lipjanit pasi i njëjti dyshohet se ka gjuajtu me armë AK-47 në një dasmë sot.

Sipas njoftimit të Policisë, i dyshuari është ndaluar për 48 orë dhe dyshohet për dy vepra penale “Përdorim i armës dhe mjetit të rrezikshëm”, dhe “Mbajtje në pronësi, kontroll ose posedim të paautorizuar të armëve”.

Komunikata e plotë:

Sot rreth orës 11:00 kemi pranuar informatën për të shtëna me armë në fshatin Medvec të Lipjanit. Menjëherë në vendin e ngjarjes kanë dalë zyrtarët policorë, të cilët kanë sekuestruar një armë AK-47 me municion dhe kanë arrestuar personin e dyshuar:

– R.B mashkull, 54 vjeç, i cili kishte shtënë në një aheng familjar.

– Personi i dyshuar është dërguar në mbajtje për 48 orë për veprat:

• Përdorim i armës dhe mjetit të rrezikshëm.

• Mbajtje në pronësi, kontroll ose posedim të paautorizuar të armëve.

Bazuar në faktet se po vazhdon të jetë prezent përdorimi i armëve të zjarrit në ndeja dhe ahengje të ndryshme, apelojmë të gjithë qytetarët që tu shmangen veprimeve të tilla për arsye të sigurisë së tyre, sigurisë së të tjerëve dhe ceremonitë festive t’i kalojnë pa ndonjë incident.

Në të kundërtën policia obligohet që në këto raste të ndërmerr masat konform detyrimit ligjor që ka.