Fotografia e Rugovës ende në Presidencë, Visar Berisha godet LDK-në: Kur periferia t'bahet qendër, e qendrës nuk guxon m'i ra

Mjeku Visar Berisha, djali i ish-kryeparlamentarit Kolë Berisha, ka kritikuar reagimin e Lidhjes Demokratike të Kosovës kundër presidentes Justina Shiroka-Pula.

Reagimi i tij vjen pas pretendimeve të LDK-së se është larguar fotografia e Ibrahim Rugovës nga Presidenca, ndonëse ajo vazhdon të gjendet aty.

Kritika merr peshë edhe për shkak të prejardhjes familjare të Berishës. Babai i tij, Kolë Berisha, ishte bashkëpunëtor i afërt i Rugovës dhe nënkryetar i LDK-së.

“Kur periferia t’bâhet qendër, e qendrës nuk guxon m’i ra!”, e ka nisur reagimin Berisha.

Ai ka kritikuar LDK-në për përqendrimin te fotografia e Rugovës, në vend të opozitarizmit dhe mbrojtjes së idealeve politike të ish-presidentit.

“Merresh me atë që s’të takon e nuk bân opozitë, sepse sdin mâ kush se a ka mbetë diçka me kundërshtue apo janë thye tona qëndrimet”, ka shkruar ai.

Berisha ka vlerësuar se vendndodhja e portretit nuk është përcaktuese për realizimin e idealeve të Rugovës.

“Se a rrin në një zyre a jo dhe ku qendron syreti i Brahimit, kjo nuk e forcon e as nuk e ligështon nevojën me mbrí te idealet e Brahimit”, ka theksuar ai.

Ai ka dalë gjithashtu në mbrojtje të presidentes Shiroka-Pula, duke vlerësuar se ajo nuk duhet të jetë objektivi i kundërshtimit politik të LDK-së.

“Zonja Justinë, presidente sot, s’âsht as rreziku e as rivali politik me të cilin duhet m’u marr (edhe pse âsht mas lehti)”, ka shkruar Berisha.

“Ajo s’âsht kundër Brahimit, madje ajo e ka njoftë shumë para se me pas lé një dyzinë burrash e grashë të idhnueme sot me të!”, ka përfunduar ai.