Ministri në detyrë, Elbert Krasniqi ka dalur publikisht në mbështetje të marshit “Drejtësi, jo politikë”, që do të mbahet të shtunën në Prishtinë.
Krasniqi ka shkruar në Facebook se është krenar që komuniteti egjiptian ka dhënë një kontribut të çmuar në luftën e UÇK-së, duke qenë komuniteti me pjesëmarrjen më të madhe në radhët e saj.
Shkrimi i plotë:
Mbështes marshin “Drejtësi, jo politikë”, që do të mbahet të shtunën në Prishtinë, në mbështetje të ish-krerëve të Ushtrisë Çlirimtare të Kosovës që po përballen me procesin gjyqësor në Hagë.
Lufta e popullit tonë për liri dhe pavarësi ishte një përpjekje e drejtë dhe historike, e udhëhequr nga vullneti i palëkundur për ta fituar lirinë dhe për ta ndërtuar shtetin tonë të pavarur.
Ndihem krenar që komuniteti egjiptian ka dhënë një kontribut të çmuar në luftën e UÇK-së, duke qenë komuniteti me pjesëmarrjen më të madhe në radhët e saj. Ky kontribut është pjesë e historisë sonë të përbashkët dhe e sakrificës për lirinë e Kosovës.
Besoj se procesi në Hagë është i padrejtë që derivon po ashtu nga një themel i padrejtë siç ishte votimi i kësaj Gjykate. Megjithatë, mbetemi të bindur se ish-krerët e UÇK-së do të dalin të pafajshëm nga ky proces dhe se, në fund, e vërteta dhe drejtësia do triumfojnë.
