Dorëzohet kërkesa për shkarkimin e Paunoviqit – Kamberi: Arsyetoi spastrimin etnik

Deputeti i vetëm shqiptar në Parlamentin e Serbisë, Shaip Kamberi, ka njoftuar se është dorëzuar kërkesa zyrtare për shkarkimin e ministres së Administratës Shtetërore dhe Vetëqeverisjes Lokale, Snezhana Paunoviq, pas deklaratave të saj për shqiptarët.

Sipas Kamberit, iniciativën e kanë ndërmarrë Grupi Parlamentar i Lëvizjes së Qytetarëve të Lirë – SDA e Sanxhakut dhe Partia për Veprim Demokratik, ndërsa ajo është mbështetur me nënshkrimet e gjithsej 53 deputetëve të opozitës.

Ai bëri të ditur se kërkesa i është dorëzuar kryeministrit të Serbisë, Gjuro Macut, me kërkesën që pa vonesë t’i propozojë Kuvendit Popullor shkarkimin e Paunoviqit.

Kamberi theksoi se arsyeja e kësaj nisme janë deklaratat e ministres, të cilat, sipas tij, arsyetojnë spastrimin etnik të shqiptarëve gjatë viteve ’90.

“Kryeministri ka përgjegjësi politike dhe institucionale të reagojë dhe të dëshmojë se në Qeverinë e Serbisë nuk ka vend për një ministre që mbron idetë e dëbimit të njerëzve mbi bazën e përkatësisë së tyre kombëtare dhe që promovon veprime jashtë ligjit dhe procedurave gjyqësore”, ka deklaruar Kamberi.