Dogana parandalon kontrabandë me vlerë mbi 5 mijë euro në Vërmicë

Dogana e Kosovës ka njoftuar se oficerët doganorë kanë parandaluar sot në pikën doganore të Vërmicës disa dërgesa të postave të shpejta, gjatë tentativave për kontrabandim të mallrave të ndryshme.

Sipas njoftimit, vlera e përafërt e këtyre mallrave, sipas vlerësimeve fillestare, kalon shumën prej 5 mijë eurosh.

Aktualisht, zyrtarët doganorë po verifikojnë saktësisht vlerën totale të produkteve, si dhe përputhshmërinë e dokumentacionit të dërgesave me rregullat doganore në fuqi.

“Ndaj personave përgjegjës janë inicuar procedurat kundërvajtëse, ndërsa mallrat janë sekuestruar në përputhje me ligjin”, thuhet në njoftim.

Dogana e Kosovës thekson se mbetet e përkushtuar në mbrojtjen e shëndetit publik dhe në garantimin që pajisjet mjekësore që hyjnë në territorin e Republikës së Kosovës të jenë të sigurta, të certifikuara dhe të kontrolluara sipas standardeve të përcaktuara me ligj.