Deputetja e Lëvizjes Vetëvendosje, Albulena Haxhiu, ka reaguar pas dështimit të votimit për formimin e qeverisë së re në Kuvendin e Kosovës,
Ajo e ka krahasuar situatën e sotme me zhvillimet e vitit 2020, kur ishte rrëzuar qeveria e parë e udhëhequr nga Albin Kurti, duke theksuar se edhe këtë herë të njëjtët aktorë politikë kanë penguar krijimin e kabinetit të ri.
Në reagimin e saj, Haxhiu ka kritikuar partitë opozitare dhe Listën Serbe, duke i cilësuar si pjesë të një grupi politik të stërvjetëruar që, sipas saj, po vepron kundër vullnetit qytetar.
Deputetja ka nënvizuar se synimi i VV-së është që Republika të funksionojë në shërbim të qytetarëve, e jo të grupeve të interesit.
Postimi i plotë:
Fytyra të para, qeshje të njohura. Dita e sotme, 26 tetor 2025, ma kujtoi 25 marsin 2020. Atëherë të gjithë këta bashkë po na rrëzonin, sot nuk mundësuan ngritjen e Qeverisë së re. Asokohe rrëzonin Kurtin 1, sot pamundësuan Kurtin 3.
Në Kuvend, Klubi i Stërvjetëruar Politik pamundësoi votimin e njeriut që populli e ka votuar më së shumti në historinë e Kosovës. Lista Serbe, si gjithnjë, pranë tyre.
Natyrisht, kjo është shumë e përkohshme. Shpesh, të njëjtit kanë menduar se e kanë mposhtur përfundimisht VV-në e Albin Kurtin, por dihet ku jemi ne e ku janë ata. Do të kthehemi sërish, me popullin në krah dhe me parimet e pathyeshme. Ata që nuk marrin mbështetje nga populli, nuk mund të na shantazhojnë me numra. Më nuk ka terminale, ambasada apo tenderë në emër të votës. As populli i Kosovës, e as ne, nuk ua kemi borxh karrigen. Dhe për këtë, VV-në e Albin Kurtin nuk do ta thyeni asnjëherë.
Matematikat e tyre nuk do të mund ta mposhtin vullnetin tonë politik. Republika nuk do të punojë për grupet e interesit, por për qytetarët pa dallim. Beteja jonë për një Kosovë me dinjitet, pa krim e pa korrupsion, vazhdon. Edhe më fuqishëm.
