“Dëm i madh politik”, Haradinaj kritikon ashpër bllokimin që iu bë marrëveshjes për Bordin e Paqes

Meliza Haradinaj, këshilltarja e ish-presidentes Vjosa Osmani, ka reaguar ashpër ndaj bllokimit nga ana e deputetëve të Lëvizjes Vetëvendosje të marrëveshjes për anëtarësimin e Kosovës në “Bordin e Paqes”, iniciativë kjo e ndërmarrë nga presidenti i ShBA-së Donald Trump.

Haradinaj, përmes një statusi në Facebook, tha se ajo çka ndodhi javën e kaluar, dhe ajo që u pa sot në Komisionin për Punë të Jashtme, sipas saj, e bën të qartë një gjë: në politikën e jashtme, vendimmarrja nga njerëz të paditur në pozita institucionale përbën rrezik të drejtpërdrejtë për shtetin dhe interesat afatgjata.

“Java e kaluar nuk ishte as keqkuptim dhe as gafë, por mungesë e thellë njohurie e dokumenteve bazë. ‘Ekspertët’ e Vetëvendosjes insistonin të ndryshonin nenin 2 të Projektligjit për Anëtarësimin e Kosovës në Bordin e Paqes dhe t’i përcaktonin po atij Bordi zonat se ku do të angazhohet për zgjidhjen e konflikteve në botë. Për këtë madje edhe themeluan Grup Punues, ku çuditërisht pranoi të ishte edhe një ish-Ministër i Jashtëm”, deklaroi ajo.

Haradinaj shtoi se Bordi i Paqes funksionon mbi një Kartë të miratuar tashmë nga shtetet themeluese, të udhëhequra nga Shtetet e Bashkuara.

“Ajo Kartë nuk interpretohet sipas dëshirës politike lokale dhe nuk rishkruhet në komisione parlamentare; ajo pranohet ose refuzohet. Çdo tentativë për të ndërhyrë në fushëveprimin e organizatës jashtë aktit themelues (Kartës), i cili përbën bazamentin juridik dhe normativ dhe përcakton mandatin e saj, është thjesht padituri. Si është e mundur të mos e dinin këtë disa deputetë në Komision të PJ?!”, u shpreh Haradinaj.

Ish-këshilltarja e Presidentes Osmani, shtoi se pas gjithë insistimit, “ekspertët” sot u zmbrapsën dhe kaluan projektligjin e dërguar nga Presidentja qysh më 12 shkurt, pa asnjë ndryshim.

“Por dëmi politik mbetet i plotë. Fqinjët armiq e lexuan menjëherë si sinjal distancimi nga ShBA dhe e shfrytëzuan kundër Kosovës”.

“Pra kur vendimmarrja në politikën e jashtme u besohet njerëzve pa kompetencë profesionale dhe pa njohuri të rendit global, rreziku bëhet automatikisht shtetëror, i menjëhershëm, dhe i kushtueshëm për të ardhmen e vendit. Uroj që në seancën e radhës në Kuvend të gjitha partitë shqiptare dhe pakicat bashkëpunuese, të ratifikojnë Projektligjin për anëtarësimin e Kosovës në Bordin e Paqes me votë unanime”, shtoi në këtë postim Meliza Haradinaj, që dikur ishte edhe kryediplomate e vendit.

Ratifikimi i Projektligjit për anëtarësimin në Bordin e Paqes, thotë ajo, është akt me peshë të dyfishtë: ai riafirmon Kosovën si subjekt aktiv të së drejtës ndërkombëtare, dhe njëkohësisht e konfirmon qartë rreshtimin strategjik me Shtetet e Bashkuara.

“Çdo hezitim në këtë proces lexohet si paqartësi gjeopolitike, ndërsa votimi unanim është mesazh i qartë i unitetit shtetëror dhe i pozicionimit të fuqishëm të Kosovës në rendin ndërkombëtar. Shpresoj që kjo situatë të shërbejë si mësim profesional dhe shtetëror për të gjithë të përfshirët”, u shpreh ish-këshilltarja e Presidentes Vjosa Osmani.

Komisioni për Punë të Jashtme dhe Diasporë ka miratuar të mërkurën Projektligjin për ratifikimin e marrëveshjes për anëtarësimin e Kosovës në Bordin e Paqes. Pas votimit në mënyrë unanime, iu hap rruga kësaj marrëveshje për miratim në Kuvend, derisa u tha se e njëjta do të miratohet para datës 28 prill, kur skadon afati për zgjedhjen e presidentit dhe rreziku për zgjedhjet e reja.