Certifikohen 15 operatorë për mbrojtje të afërt

Sot në ambientet e Akademisë së Kosovës për Siguri Publike –Vushtrri, u mbajt ceremonia e certifikimit të 15 operatorëve të rinj të Drejtorisë për Mbrojtje të Afërt.

Sipas njoftimit është bërë e ditur se operatorët kanë ndjekur një trajnim intensiv dhe shumë sfidues me gërshetim të pjesës teorike dhe asaj praktike-ushtrimeve taktike në terren në kohë të ndryshme të ditës me gjithsej 680 orë trajnim, ku pos tjerash janë testuar shkathtësitë fizike, taktikat mbrojtëse dhe artet marciale, gjuajtja me armë kalibrash të ndryshëm, orientim në natyrë, lëshim me litar, mbijetesa në ujë, vozitje taktike etj.

Operatorëve të certifikuar iu ndanë certifikatat përkatëse nga drejtori i përgjithshëm i Policisë së Kosovës kolonel Gazmend Hoxha me drejtorët e departamenteve përkatëse dhe u.d. drejtori i përgjithshëm, i AKSP-së z. Shpend Shabani. Me këtë rast drejtori Hoxha iu drejtua të certifikuarve duke i uruar fillimisht për suksesin e treguar e më pas nga ta kërkoi disiplinë dhe përkushtim në realizim të detyrave të parapara.

Po ashtu, për të pranishmit u ekzekutuan disa skenarë të ushtrimeve praktike për mbrojtjen e personaliteteve.