BE-ja kërkon ndërprerjen e rrënimit të vilave në Ujman, kërkon respektim të procedurave ligjore

Bashkimi Evropian ka shprehur shqetësim lidhur me rrënimin e disa vilave pranë liqenit të Ujmanit në veri të Kosovës, duke vlerësuar se në këtë rast nuk është respektuar procedura e rregullt ligjore.

Në një reagim të publikuar nga Zyra e BE-së në Kosovë, është thënë se banorët e prekur kishin nisur procedura gjyqësore brenda afatit të përcaktuar nga ndërmarrja publike “Ibër-Lepenc” për lirimin dhe pastrimin e tokës.

“BE-ja në Kosovë shpreh keqardhje për rrënimin e djeshëm të shtëpive pranë Liqenit të Gazivodës/Ujmanit, i cili ndodhi ndërkohë që banorët e prekur kishin nisur procedura gjyqësore brenda afatit 15-ditor të përcaktuar në njoftimet e ndërmarrjes publike Ibër-Lepenc/Ibar-Lepenac për lirimin dhe pastrimin e tokës”, thuhet në reagimin e BE-së.

Sipas BE-së, mungesa e respektimit të procedurave ligjore është vërejtur edhe në raste të tjera në veri të Kosovës gjatë muajve të fundit.

“BE-ja është e shqetësuar për mungesën e respektimit të procedurës së rregullt ligjore në këtë dhe në disa raste të tjera të kohëve të fundit në veri të Kosovës që nga shkurti i këtij viti”, thuhet më tej në reagim.

BE-ja ka bërë thirrje për ndaljen e veprimeve të mëtejshme deri në adresimin e çështjeve që lidhen me procedurat ligjore, të drejtat pronësore dhe mjetet juridike.

“Ajo bën thirrje për ndërprerjen e menjëhershme të çdo rrënimi, largimi të detyruar apo marrjeje në posedim të mëtejshme derisa shqetësimet lidhur me procedurën e rregullt ligjore, proporcionalitetin, të drejtat pronësore, të drejtat e njeriut dhe mjetet juridike efektive të adresohen në mënyrë të duhur”, thuhet në deklaratë.

Autoritetet e Kosovës nisën një ditë më parë aksionin për rrënimin e 11 vilave të ndërtuara pa leje në zonën e Ujmanit, pas kërkesës së ndërmarrjes publike “Ibër-Lepenc”, në pronën e së cilës pretendohet se janë ngritur objektet.

BE-ja ka komentuar edhe rolin e Policisë së Kosovës në këtë aksion, duke kërkuar që ndërhyrjet e saj të jenë në përputhje me mandatin ligjor.

“Roli i Policisë së Kosovës në operacione të tilla duhet të mbetet rreptësisht brenda mandatit të saj ligjor, të bazohet në kërkesa ose vendime të qarta të autoriteteve kompetente dhe të dokumentohet në mënyrë të duhur”, thuhet në reagim.