Nënkryetarja e Lidhjes Demokratike të Kosovës Hykmete Bajrami, ka reaguar ashpër ndaj politikave të qeverisë udhëhequr nga Albin Kurti.
Bajrami ka kritikuar rritjen e çmimeve të energjisë dhe të tatimit në pronë për bizneset vendore.
“Albini Kurti ua rriti bizneseve vendore çmimin e energjisë 300%, ua rriti tatimin në pronë dhe tani u thotë: ‘vendosa që ju t’ua rritni pagat punëtorëve”, ka shkruar Bajrami. Ajo theksoi se kostot e larta nuk përkthehen në përmirësim të pagave për punëtorët.
Hykmete Bajrami, kujtoi grevën e një viti më parë të grave që punonin për një kompani private që mirëmbante ndërtesën e Kuvendit dhe kërkonin pagën minimale prej 350 euro:
“Mbajtën grevë më shumë se dy muaj, 100 metra larg zyrës së Kryeministrit, dhe sot shumica e tyre janë pa punë.”
Bajrami thekson se këto gra “lexojnë sot statusin e Albin Kurtit për pagën minimale dhe kanë të drejtë vote më 28 dhjetor,” duke sugjeruar se qytetarët do të kenë mundësinë të reflektojnë mbi politikat e qeverisë në zgjedhjet e ardhshme.
