Kandidatja e PDK-së për kryetare të Pejës, Arta Nallbani, së bashku me kandidatin për Asamble Komunale, Nasret Hajrizi, kanë vizituar sot ndërmarrjen vendore “Ajaka Foods”, një agrobiznes që operon në sektorin e prodhimit dhe përpunimit ushqimor.
Gjatë vizitës, Nallbani vlerësoi rëndësinë që kanë bizneset vendore për zhvillimin ekonomik të qytetit, duke i cilësuar si “shtylla të ekonomisë lokale dhe tregues të potencialit të jashtëzakonshëm që ka Peja”.
“Sot, së bashku me kandidatin për Asamble, Z. Nasret Hajrizi, vizituam ndërmarrjen “Ajaka Foods”, një agrobiznes dhe prodhues vendor në Pejë. Biznese të tilla janë shtylla të zhvillimit ekonomik lokal dhe tregues i potencialit të jashtëzakonshëm që ka qyteti ynë. Ato krijojnë punësim, gjallërojnë ekonominë dhe e bëjnë Pejën konkurruese në tregun vendor e më gjerë.
Unë dhe ekipi im jemi të vendosur t’i mbështesim këto biznese me të gjitha mjetet në dispozicion, duke u krijuar kushte më të mira për zhvillim dhe zgjerim. Për ne, agrobizneset dhe prodhuesit vendorë nuk janë vetëm biznese, por partnerë strategjikë në vizionin tonë për një Pejë më të zhvilluar, më të fortë ekonomikisht dhe më të drejtë për secilin qytetar”, shkroi Vokshi-Nallbani.
