Një motorist i kompanisë së shpërndarjes së ushqimit “Wolt Albania” është arrestuar nga Policia e Tiranës, si pjesë e një operacioni të gjerë antidrogë që goditi një grup kriminal të shpërndarjes së lëndëve narkotike në kryeqytet.
Sipas policisë, në pranga ka rënë Erdison Gjella, i cili dyshohet se kamuflonte aktivitetin e paligjshëm duke u paraqitur si motorist shpërndarjeje ushqimi. Hetimet tregojnë se ai përfitonte nga lëvizja e lirë në qytet dhe mungesa e dyshimeve gjatë kontrolleve, për të shpërndarë drogë në zona të ndryshme të Tiranës.
Arrestimi i tij u bë në kuadër të operacionit policor të koduar “Labirinti 2”, i cili u finalizua pas katër javësh hetime intensive nga Seksioni për Hetimin e Narkotikëve, në bashkëpunim me Prokurorinë e Tiranës.