Abdixhiku takon ambasadorin e ri gjerman: E informova për procesin e zgjedhjeve lokale e funksionalizimin e Kuvendit

Kryetari i Lidhjes Demokratike të Kosovës, Lumir Abdixhiku, është takuar sot me ambasadorin e ri të Gjermanisë në Kosovë, Rainer Rudolph.

Përmes një postimi në Facebook, Abdixhiku ka njoftuar se e ka uruar ambasadorin për fillimin e mandatit të tij në Kosovë, duke i dëshiruar suksese në detyrën e re diplomatike.

Kreu i LDK-së, poashtu bëri të ditur se gjatë takimit kanë diskutuar për zhvillimet e fundit politike në vend, përfshirë procesin e zgjedhjeve lokale dhe funksionalizimin e Kuvendit të Kosovës.

“Shpreha mirënjohjen time për mbështetjen e vazhdueshme që Gjermania i ka dhënë Republikës së Kosovës në të gjitha fazat e zhvillimit dhe forcimit të institucioneve tona demokratike.

Ambasadorit të ri, i urova fat e mbarësi në mirëmbajtjen dhe ngritjen e nivelit të bashkëpunimit mes të dy shteteve”, ka shkruar ndër të tjerash Abdixhiku.