73-vjeçarja e lënduar në aksidentin e ndodhur në Mitrovicë pasi u godit nga një automjet është duke u trajtuar në Qendrën Klinike Universitare të Kosovës.
Drejtori i Emergjencës në QKUK, Naser Syla, ka treguar se e lënduara ndodhet në gjendje të rëndë shëndetësore.
Syla bëri të ditur se pacientja i është nënshtruar të gjitha ekzaminimeve të nevojshme mjekësore dhe më pas është dërguar në sallën e operacionit, ku po trajtohet nga ekipet e Neurokirurgjisë dhe Anesteziologjisë.
Ai poashtu theksoi për Klankosova.tv se pas përfundimit të ndërhyrjes kirurgjikale, pacientja do të vazhdojë trajtimin në Klinikën e Mjekimit Intensiv.
“Pacientja është në gjendje të rëndë. Janë kryer ekzaminimet e nevojshme dhe është dërguar në sallën e operacionit nga ekipet e Neurokirurgjisë dhe Anesteziologjisë. Pas trajtimit do të vazhdojë mjekimin në kujdes intensiv”, ka deklaruar Syla.
Edhe zëdhënësja e Policisë së Kosovës për Rajonin e Mitrovicës, Fexhrije Pllana, e cila konfirmoi se aksidenti ka ndodhur mes një kombi dhe një këmbësore.
“Sot rreth orës 17:30 në rrugën “Agim Ramadani”- Katana në Mitrovicë është raportuar një aksident trafiku me lëndime të rënda, ku të përfshire në aksident është një automjet transportues dhe një këmbësorë, viktima është dërguar në emergjencën e Spitalit Rajonal Mitrovicë Jugu ku pas marrjes se trajtimit, është dërguar në QKUK Prishtinë për trajtim të mëtutjeshëm”, ka thënë Pllana
