46 vjeç dhe sërish në futboll! Ronaldinho bën të pabesueshmen në Itali

Një prej emrave më të mëdhenj të futbollit botëror ka vendosur të rikthehet sërish në fushë. Ronaldinho, tashmë 46-vjeçar, ka mbërritur në Ravenna për të nisur një aventurë krejtësisht të veçantë në futbollin italian.

Legjenda braziliane u shfaq në aeroportin e Forlìt, nga ku vazhdoi rrugëtimin drejt Ravenna-s. Rikthimi i tij përbën një nga lëvizjet më të pazakonta të viteve të fundit për klubin italian.

Pas mbërritjes, Ronaldinho nuk e fshehu entuziazmin për kapitullin e ri. Braziliani tha se është i lumtur që ndodhet në Itali dhe se synimi i tij është të ndihmojë ekipin, të motivojë futbollistët dhe të kontribuojë në një sezon sa më të suksesshëm.

“Jam shumë i lumtur që jam këtu, me miqtë e mi. Shpresojmë që gjërat të shkojnë mirë për ekipin. Kam ardhur këtu për të ndihmuar, për t’i emocionuar lojtarët e tjerë, për të pasur një sezon spektakolar dhe për të fituar”, deklaroi ai.

Pas këtij rikthimi që ka befasuar botën e futbollit, presidenti i klubit, Ignazio Cipriani, ka treguar se si u arrit marrëveshja me brazilianin. Sipas tij, Ronaldinho u bind nga miqësia, pasioni dhe projekti i klubit.

Cipriani shpreson që ish-ylli i Barcelonës dhe Milanit të zbresë të paktën edhe një herë në fushë, ndërsa e ka përshkruar marrëveshjen si një projekt që synon të afrojë qytetin me ekipin.

Ronaldinho, ndërkohë, ka rikujtuar edhe periudhën e tij të paharrueshme në Itali me fanellën e Milanit.

Mes shumë momenteve të bukura, braziliani veçoi një gol që vazhdon ta mbajë me shumë krenari.

“Kam pasur shumë momente të mira, por goli në derbi është një prej kujtimeve që më jep më shumë kënaqësi”.

Kështu, në moshën 46-vjeçare, Ronaldinho po përgatitet për një tjetër kapitull në futboll – këtë herë në një rol që mund të sjellë edhe një rikthim të tij simbolik në fushë.