Ky do të jetë numri i madh i tifozëve shqiptarë që do ta mbështesin sonte Shqipërinë në Pragë

Kombëtarja e Shqipërisë është gati për duelin e ditës së sotme ndaj Çekisë (ora 20:45), e vlefshme për kualifikueset e Evropianit.Kuqezinjtë zhvilluan pasditen e djeshme seancën stërvitore në ambientet e stadiumit “Fortuna Arena” ku do të zhvillohet ndeshja.

Në kampin kuqezi mbizotëron klima pozitive, me lojtarët që duken të gjithë gati për të dhënë maksimumin në këtë duel të rëndësishëm për rrugëtimin drejt Evropianit 2024.

Të drejtuarit e Sylvinhos janë momentalisht në vendin e dytë në grup, duke siguruar 6 pikë nga 3 ndeshjet e para, me një humbje ndaj Polonisë dhe dy fitore ndaj Moldavisë, respektivisht Ishujve Faroe.

Sipas presidentit të FSHF-së, Armand Duka, sonte në Pragë pritet që në përkrahje të Shqipërisë të jenë së paku 4 mijë shqiptarë.“As sot dhe as më parë nuk kemi superstarë, por mendoj se kemi një skuadër që meriton të jetë pjesë e Euro 2024. E ndihmuar shumë nga gjithë ambienti, nga tifozeria. Edhe në stadium në Pragë, do të kemi mbi 4 mijë shqiptarë që do të mbështetin skuadrën. Ata do e ndihmojnë skuadrën për të arritur atë që të gjithë dëshirojmë”, tha Duka për Supersport.