Kështu e kujtonte Haxhi Shala, momentin kur me uniformë të UÇK-së e i maskuar i kishte shkuar në odë babait të tij që i vdiq dje

Haxhi Shala – Komandant Topi, pak muaj para se të arrestohej nga Haga, ishte i ftuar në emisionin N’Demos, ku kishte rrëfyer momentin emocional, kur pas inkuadrimit në radhët e UÇK-së, për herë të parë e kishte takuar babain, i cili i vdiq sot.

Shala e kishte takuar babain e tij, tek pas një muaji pasi ishte bërë pjesë e Ushtrisë Çlirimtare të Kosovës, anipse operonte në zonën ku jetonte familja e tij.

Aso kohe babai i tij, Haxhi Shalën, e dinte në Zvicër, ku kishte shkuar për të punuar dhe siguruar të ardhura për familjen, por që Haxhi Shala ishte kthyer një muaj më parë duke iu përgjigjur thirrjes së atdheut.

“Një natë ishim lodhë, po edhe ishim uritë edhe Fatmiri tha sonte dojna me shku te baci Gjelë. Unë shpesh folsha në telefon prej Kleçkës, qysh je? Thojsha që e mirë, në Zvicër, qysh po shkojnë puntë, qysh janë fëmijët, me vetke unë i jepesha përgjigje si me kanë në Zvicër, një muaj ditë.

Kha tuj i thanë këta dajtë e babës e ata nipat, a të kanë ardhë do mysafirë, po jo me i thanë drejtpërsëdrejti. Një muaj ditë, ne nuk u lajmëruam në shtëpi. Pas një muaji na ra puna dhe Fatmiri tha hajde more kthehemi te baci Gjelë, hamë darkë tha edhe le të na sheh. Po prap vendosëm, Ismeti pa maskë, ne të dy me maska, unë e Fatmiri. Tash ne odën e kishim, odat që i kemi pasë përpara të dyert. Ish hala ftohtë, prilli. Shkuam, u gëzu, dul një vëlla na priti, na shtini brenda.

Erdh plaku qashtu në pixhame qysh o kanë ratë, u qu këmbëkryq, kap neve ngryk, eu shqyqyr edhe na e lamë veç Ismeti me folë, se po të folshim unë e Fatmiri, na njofke se ishim rritë në duar të tij. Po u kall kaftorri e tuj pi kafe e tuj hangër do bukë, e ksajde maska u bëjke ibret, se nuk kishim maska origjinale, dofar qorape të zeza, veç ua kishim pre gojën e sytë kështu, filluan djersët me na dalë, mua edhe Fatmirit, edhe Fatmiri tha, a i hjekim bre? I thash hiqe more. Kur i hoqëm maskat, po më këqyr tash, se unë i kisha edhe tre vëllezër në shtëpi.

I vetmi burim financiar, në atë kohë në familjen tonë isha unë, se isha duke punu në Zvicër. Eu tha Haxhi po mirë paske bërë, po edhe fikë derën ma paske, tha. Po a ti qoj këta tre tha, e ti kthehu, se tha gjynah fëmijët. I thash jo, jo, na jena ardhë këtu. I thash sivjet kena me punu tokën bashkë. I thash, s’ka më Zvicër, këtu kena me vazhdu luftën. E hallall të koftë tha. Tani erdh nana, po ajo pak ma e fortë në atë moment qëlloi. Ajo tha mirë, i paske edhe shokët e mirë, veç vazhdoni, ishalla Zoti ju ndihmon”, kishte rrëfyer Haxhi Shala, në emisionin N’Demos.

Kujtojmë se babai i Haxhi Shalës, ka ndërruar jetë sot, përderisa i biri i tij, po mbahet në Qendrën e Paraburgimit në Hagë, në pritje të fillimit të gjykimit nga Gjykata Speciale./GazetaDemos/