Hashim Thaçi që tri orë brenda tek babai i tij në QKUK

Ish-presidenti Hashim Thaçi ndodhet në Kosovë për vizitë tek babai i tij i cili ndodhet i shtrirë në QKUK në gjendje të rëndë shëndetësore, shkruan Gazeta Demos.

Ai u soll nga Policia e Kosovës dhe EULEX-i në QKUK, ku u prit me thirrjet “UÇK-UÇK”, ndërsa përshëndeti me dorë edhe qytetarët që ishin mbledhur për të.

Janë bërë tri orë që kur Thaçi po qëndron brenda QKUK-së, numri i qytetarëve që po presin për ta parë ish-presidentin nga afër, veçse është rritur.

Krahas qytetarëve, aty është parë edhe vëllai i tij, Nazmi Thaçi.

“Për arsye humanitare bindëse, Trupi Gjykues dhe Gjykatësja e Procedurës Paraprake kanë udhëzuar Zyrën Administrative që të menaxhojë një vizitë nën mbikqyrje në Kosovë të Hashim Thaçit për ta takuar babain e tij. I akuzuari mbetet në paraburgim të Dhomave të Specializuara”, tha zëdhënësi Michael Doyle nga Dhomat e Specializuara.

Thaçit deri më tani i ishin refuzuar dy kërkesa për ta vizituar babanë e sëmurë e kjo me sukses ishte e treta që e solli në Kosovë.