Armando Duka tregon pse e organizuan me Serbinë Evropianin: I ftoj të gjithë ta shohin ndeshjen

Presidenti i Federatës Shqiptare të Futbollit, Armand Duka është rikthyer të flasë për organizimin e Kampionatit Evropian U-17 të vitit 2027.

Ai foli edhe për ndjeshmërinë që e ka kjo temë në Kosovë, ku FSHF-ja ka marrë kritika të ashpra për këtë veprim.

“Në muajin maj 2025 do të presim finalet e Europianit U-17. Është i pari Europian që ne presim, nuk kemi organizuar më parë një turne final. Më 31 mars hidhet shorti dhe nis më 19 maj. Jam i bindur që do të jetë një organizim i suksesshëm. Në 2027 do të presim finalet e Europianit U-21. Ka qenë çështje diskutimi, jemi të vëmendshëm në kritikat dhe vërejtjet, sharjet e tifozëve se pse ne kemi bashkëpunuar me Federatën serbe për kampionatin. Ne jemi një organizatë sportive dhe ky është një event sportiv. Qëllimi kryesor është sportiv. Pa dyshim edhe pragmatist sepse ky ishte një shans për t’u shfrytëzuar për të pasur një kampionat europian sepse unë dyshoj në historinë e Shqipërisë që do të përsëritet dhe uroj që të përsëritet sërish”, deklaroi kreu i futbollit shqiptar për “Nazarko Podcast”.

“Edhe nga ana politike, pa dyshim që jo vetëm e kam përjetuar atë që ka përjetuar çdo kosovar (jo në të njëjtën mënyrë sepse nuk kam qenë fizikisht në Kosovë), por të gjithë ne e kemi mbështetur dhe jemi munduar të lehtësojmë dhimbjen e shqiptarëve të Kosovës. E di historinë, por mesazhi është që ne duhet të shohim përpara. Ne nuk do ta ndryshojmë Serbinë, nuk do ta lëvizim Serbinë nga vendi. Ajo do të rrijë aty, Kosova do të rrijë aty. Pavarësisht dhimbjes, duhet të gjejmë mënyrën dhe  duhet të gjejmë ura komunikimi. Nëse kjo do të ndikojë apo jo pak pozitivisht, unë besoj se po. Dhe nëse kjo i shërben përmirësimit të jetës së fëmijëve në Kosovë, unë do të jem i kënaqur. Do lëndojë disa sepse plagët janë të freskëta, por ne duhet të shohim përpara”, vazhdoi Duka.

“Ndeshja me Serbinë në Tiranë, sa po punon FSHF? Ekziston emocioni, pesha e historisë mes dy kombëtareve. Unë i ftoj të gjithë, besoj se do ta bëjnë të gjithë, ta shohim ndeshjen me Serbinë si një ndeshje futbolli dhe asgjë më shumë. Objektivi ynë kryesor është që të fitojmë sportivisht. Nëse fitojmë sportivisht, i kemi fituar të gjitha.