Presidentja e Kosovës, Vjosa Osmani ka pritur në takim të rregullt drejtorin e Agjencisë së Kosovës për Inteligjencë, Petrit Ajetin.
Sipas njoftimit nga Presidenca, Osmani dhe Ajeti kanë diskutuar lidhur me zhvillimet e fundit në veri të vendit, shkruan lajmi.net.
“Z. Ajeti ka njoftuar Presidenten Osmani për situatën aktuale të sigurisë kombëtare. Në takim u diskutua edhe për vazhdimin e koordinimit të të gjitha institucioneve të sigurisë në vend për të garantuar mjedis të sigurt për të gjithë qytetarët e Republikës”, thuhet në njoftim.
Kujtojmë se gjatë javës së fundit zyrtarët serbë kanë dhënë dorëheqje nga institucionet e Kosovës duke kundërshtuar kështu vendimet e Qeverisë së Kosovës lidhur me targat dhe duke kërkuar zbatimin e marrëveshjes mes Kosovës dhe Serbisë për themelimin e Asociacionit e komunave me shumicë serbe.