Zeqiri: Nuk shoh kushte për mbajtje të zgjedhjeve të reja në veri

Kryetari i Zubin Potokut, Izmir Zeqiri, nuk e sheh si opsion mbajtjen e zgjedhjeve të reja në veri.

Zeqiri, i cili është deklaruar se është i hapur për të dhënë dorëheqje, megjithatë thotë se nuk sheh kushte për mbajtjen e zgjedhjeve, shkruan gazeta online Reporteri.net.

“Nuk kemi biseduar për këtë proces fare, as me kryeministrin që s’kam pasë takim kurrë asnjëherë qysh prej zgjedhjeve… s’kemi pasë kogja moti as me Ministrinë e Administrimit të Pushtetit Lokal. Për këtë temë nuk kemi biseduar me asnjë faktor, përpos me mediat”.

“Nuk shoh as parakushte as kushte që mund të ndodhin [zgjedhjet]. Mirëpo, në pyetje se a më mirë është shkarkimi apo dorëheqja vullnetare, unë kam deklaruar se më e dinjitetshme do të ishtë dorëheqja vullnetare pas një marrëveshje politike, Qeveri-Partia Demokratike edhe kryetarët e komunave. Kjo do të ishte më e favorshme edhe për ekipin e Republikës së Kosovës në bisedime në Bruksel”, tha Zeqiri në Klan Kosova.

Ndërkohë, Presidentja e vendit, Vjosa Osmani, tha po ashtu sot se në veri të Kosovës po punohet drejt mbajtjes së zgjedhjeve të reja.

“Presidentja Osmani theksoi se prezenca e Policisë Speciale të Kosovës në objektet komunale dhe rreth tyre në veri tashmë është zvogëluar, ndërsa po vazhdon puna për plotësimin e infrastrukturës ligjore për mbajtjen e zgjedhjeve të reja në katër komunat e veriut nëpërmjet peticionit të qytetarëve”, theksohet në komunikatën e Presidencës.