Ylli i Real Madridit për Modric: Unë kam dy muaj që luaj mirë, ai ka 10 apo 12 vjet që është tjetër nivel

Dani Ceballos aktualisht është duke luajtur sezonin e jetës së tij. Ai është një lojtar i spikatur i Realit në fushë dhe ka kthyer besimin e trajnerit.

Pasi Ceballos nuk u përfshi në kombëtaren spanjolle që shkoi në Botërorin e Katarit, u duk se karriera e tij do të merrte një rënie. Megjithatë, ai filloi të luante shkëlqyeshëm dhe bëri që tifozët të kërkojnë qëndrimin e tij në klub. Ashtu si Modric dhe Kroos, edhe Ceballos është ndër lojtarët e Realit me kontratë deri në fund të sezonit dhe këta të dy i përmendi si modele me të cilët rritet dhe luan më mirë.

“Unë nuk dua një vazhdim të kontratës nëse nuk e meritoj. Më kanë mbetur edhe tre muaj dhe dua të luaj, dhe pastaj do të ulem me agjentin tim dhe familjen time dhe do të marr vendimin më të mirë. Dëshira ime është të qëndroj, por dua që klubi të vendosë nëse ia vlen apo jo”, tha Ceballos dhe iu përgjigj pyetjes për Modric.

“Ai erdhi në Madrid kur ishte 26 vjeçar. Është motivues për mua të luaj me një legjendë të tillë. Shpresoj të kem 50 për qind të karrierës së tij, individualisht dhe në nivel ekipor. Ai duhet të jetë shembull. Unë luaj mirë për dy muaj, Luka dhe Toni kanë qenë në nivelin më të lartë për 10 apo 12 vjet”, përfundoi Ceballos.