Në një konferencë shtypi për media pas mbledhjes së kryesisë së partisë së tij, ku u diskutua mandati i qeverisë së re të Serbisë, presidenti Vucic u përgjigj edhe për çështjen e Kosovës dhe krizës së fundit. Ai madje foli për krizën energjetike në Kosovë.
Ai u pyet se si do ta mbrojë KFOR’i popullin serb në Kosovë, dhe se KFOR’i siç është thënë nuk do të lejojë barrikada në veri. Vucic u përgjigj që KFOR duhet të mbrojë pakicat dhe nuk duhet të lejojë keqtrajtimin dhe provokimin e serbëve.
Vucic, siç bën shpesh, u ankua për hipokrizinë e bashkësisë ndërkombëtare dhe standardet e dyfishta, ku theksoi dallimin në qasjen se çka nënkuptohet me normalizimin e marrëdhënieve Kosovë-Serbi, sipas tij.
Ai pastaj përmendi krizën që aktualisht e ka kapluar Kosovën me reduktime të rrymës: “Në Kosovë e Metohi çdo ditë do të ndalin rrymën dhe ja eja të provojmë e të ndihmojnë, që të kursejme së paku 5 a 10 ditë. Këto ndërprerje do të vrasin njerëz, do të vrasin makineri në shtëpi, ja eja të provojmë e të kursejmë 5 a 10 ditë”, tha më tej ai.
Presidenti Vucic vazhdoi: “Nëse do të mund t’u dhurojmë rrymën kur e kemi, ja po ua dhëmë. Por jo të flitet që Vucic nuk është i gatshëm për normalizim. T’ua vëmë emrin gjërave siç duhet, Vucic nuk është i gatshëm ta njohë Kosovën, kjo për ta është normalizim.”
Vucic shtoi më tej se duan t’i zgjedhin problemet mes serbëve dhe shqiptarëve: “Por jo nuk dua që ta pranoj Kosovën. Dhe menjëherë qenkam kundër normalizimit. Shikoni se çfarë shkruajnë media të caktuara botërore, se çfarë rrenacakësh janë. Unë kam thënë se shpresoj që KFOR’i dhe NATO nuk do të lejojnë pogrom dhe vrasje të serbëve, dhe nëse ata nuk i mbrojnë ne do ta bëjmë.”
“Titulli në media ishte ‘Vucic kërcënoi se do sulmojë Kosovën’. Lëre anash që është rrenë, atyre as që nuk u interesoi se ndoshta do të kishte pogrom ndaj serbëve, kjo pra sipas tyre do të ishte në rregull. Unë thashë se do të mbrojmë popullin, por siç duket unë s’e paskam thënë këtë, paskam thënë që do ta sulmoj Kosovën. Po rreni, dhe s’ka që e mat sa po rreni”, u shpreh i frustruar Aleksandar Vucic.
Të dielën Vucic doli në adresimin e tij të famshëm “më të rëndësishmin ndonjëherë” me pretendime se pala serbe ishte ajo konstruktive, ndërsa kosovarja ajo refuzuese. Ai shkoi aq larg sa tha që në Kosovë ka grupe çeçene terroriste që po përgatisin pogrom ndaj serbëve. Ai madje paraqiti edhe gjashtë pikat e propozuara nga Republika e Kosovës për normalizim të marrëdhënieve, ku përfshihej njohja reciproke mes dy vendeve, gjë që është kategorikisht e papranueshme për palën serbe.