Vazhdon edhe sot Forumi Ndërkombëtar për Gratë, Paqen dhe Sigurinë

Edhe sot Prishtina do të jetë nikoqire e edicionit të tretë të Forumit Ndërkombëtar për Gratë, Paqen dhe Sigurinë.

Forumi ka mbledhur mbi 150 folës nga më shumë se 45 vende të botës, të cilët do të marrin pjesë në më shumë se 30 panele diskutimi.

Presidentja, Vjosa Osmani, gjatë hapjes së këtij forumi të hënën theksoi rëndësinë kyçe të grave dhe fëmijëve në ndërtimin e paqes.

Ajo e cilësoi këtë ngjarje si një apel global për veprim, sidomos në kohë sfiduese.

”Dhe ‘kurrë më’ do të bëhet më shumë se një moto, vetëm kur ‘kurrë më’ do të thotë të refuzosh armët si zgjidhje dhe të zgjedhësh dialogun… Sepse fëmijët tanë e meritojnë. Sepse të gjithë fëmijët në botë e meritojnë”.

”Ata meritojnë të kenë një fëmijëri që jetohet, jo që u vidhet. Ata meritojnë të rriten, të ëndërrojnë dhe të lulëzojnë…”.

”Sepse nuk ka asgjë më të vlefshme sesa të luftosh për paqe. Sepse paqja është themeli i gjithçkaje për të cilën përpiqemi”.