U shpërblye me pozitë në KPM, Luljeta Aliu reagon me publikim në Facebook

Anëtarja e zgjedhur sot e Komisionit të Pavarur të Mediave (KPM), Luljeta Aliu, ka thënë se “jeta është dashuri” në një reagim pak pasi u votua si anëtare e re e organit mbikëqyrës të mediave televizive.

Në një publikim në Facebook, ajo ka shfaqur fotografitë e disa luleve dhe ka shkruar fjalë pozitive mbi jetën.

“Jeta është dashuri. Ajo na ofron lumturi përmes gjallërisë dhe bukurisë së saj, pa e kërkuar ne fare”, ka shkruar Aliu.

Luljeta Aliu-Krasniqi, është zgjedhur sot anëtare e Komisionit të Pavarur të Mediave (KPM).

Zgjedhja e saj anëtare e KPM-së është realizuar përmes një votimi të deputetëve në Kuvendin e Kosovës të mërkurën.

48 deputetë votuan për zgjedhjen e Aliu-Krasniqit në pozitën e anëtares së KPM-së. Kundër-kandidatja e saj, e rekomanduar po ashtu për këtë pozitë, Luljeta Hyseni-Kelmendi, mori vetëm 28 vota, raporton Paparaci.

Kreu i Kuvendit të Kosovës, Glauk Konjufca konkludoi se votimi për zgjedhjen e anëtares së KPM-së nga radhët e grave, përfundoi me sukses në raundin e parë të votimit.

“Mund të konkludojmë se për anëtare të KPM-së nga radhët e grave, me 48 vota zgjedhet anëtare Luljeta Aliu-Krasniqi, kurse për kandidatët e propozuar për zgjedhjen e dy anëtarëve nga radhët e burrave, nuk ka arritur të zgjedhet asnjë anëtarë”, tha kryetari Konjufca.

Ndërkaq, votimi për zgjedhjen e dy anëtarëve të tjerë të KPM-së të mërkurën ka dështuar. Konjufca ka thënë se votimi për këto dy pozita do të rishpallet dhe përsëritet.

“Ne zonjës Luljeta Aliu-Krasniqi i urojmë suksese dhe punë të mbarë, kurse për dy pozitat e tjera të KPM-së konkursi rishpallet dhe përsëritet”, tha Konjufca.

Luljeta Aliu-Krasniqi, prej kohësh ka synuar të bëhet pjesë e KPM-së. Vitin e kaluar, propozimi i saj për anëtare të këtij organi shtetëror për mbikëqyrjen e mediave, nuk kishte kaluar në kuvend.

Pas rishpalljes së konkursit, ajo kishte kandiduar sërish. Ishte vlerësuar me më së shumti pikë nga Komisioni Ad-Hoc për Përzgjedhjen e Anëtarëve të KPM-së. Sot, ajo ka fituar mandatin e parë të saj në KPM.