Të shtënat me armë zjarri në rrugën “Astrit Rrushi” në Prishtinë – Policia identifikon të dyshuarin

GazetaDemos raportoi ekskluzivisht për një gjuajtje me armë që ka ndodhur sot në lagjen Muharrem Fejza, përkatësisht tek rruga “Astrit Rrushi” në Prishtinë.

Sipas informacioneve të dhëna për Gazetën Demos nga vendi i ngjarjes, personi që dyshohet se u gjuajtë me armë i tha policisë se ‘‘Isha duke ecur dhe dikush vetëm më ka thirrë Edon dhe ma ka drejtuar armën. Unë cikcak kam ikur derisa ai ka gjuajtur 3-4 plumba”.

Ndërkaq, lajmin për GazetënDemos e ka konfirmuar zëdhënësja e policisë për rajoin e Prishtinës, Flora Ahmeti.

Sipas saj, njësitë policore kanë dalë menjëherë në vendin e ngjarjes sapo është marrë informata për të shtëna me armë, ndërsa fatmirësisht nuk raportohet për persona të lënduar.

“Rreth orës 15:00 kemi marrë informatën për të shtëna me armë zjarri, në rrugë ‘Astrit Rrushi’ në Prishtinë. Njësitet policore menjëherë kanë dalë në vendin e ngjarjes, nuk raportohet për persona të lënduar,” tha Ahmeti.

Tutje, ajo njoftoi se hetuesit policor kanë nisur një hetim për rastin ndërsa janë në kërkim të personit të dyshuar, i cili tashmë është identifikuar.