Zvicra e ndarë rreth propozimit për të kufizuar popullsinë në 10 milionë

Opinioni publik zviceran është pothuajse i ndarë në mënyrë të barabartë për çështjen e një propozimi për referendum që do ta kufizonte popullsinë në 10 milionë, tregoi një sondazh i ri i kryer përpara votimit të planifikuar për 14 qershor.

Sipas një ankete nga instituti GfS në Bernë, për transmetuesin publik SRG, 47 për qind e të të anketuarve e mbështesin iniciativën, e njëjta përqindje është kundër, ndërsa pjesa tjetër e të anketuarve nuk kishin mendim, raportoi Reuters-i.

Sondazhi u krye në një mostër prej 19,728 personash midis 20 prillit dhe 3 majit.

Propozimi, i mbështetur nga Partia Popullore Zvicerane (SVP) e krahut të djathtë, parashikon që popullsia e përhershme e vendit të mos kalojë 10 milionë deri në vitin 2050, si dhe t’i japë fund marrëveshjes për lirinë e lëvizjes me Bashkimin Evropian.

Qeveria zvicerane e kundërshton iniciativën, duke paralajmëruar se miratimi i saj mund të dëmtojë marrëdhëniet me BE-në, partnerin kryesor tregtar të vendit, dhe të ndikojë negativisht në ekonomi.

Shifrat zyrtare tregojnë se popullsia e Zvicrës kohët e fundit i kaloi nëntë milionë banorë, me shtetas të huaj që përbëjnë më shumë se 27 për qind të popullsisë.

Paralelisht, vendi po diskuton një marrëveshje më të gjerë me BE-në të arritur në fund të vitit 2024, e cila do të thellonte integrimin ekonomik, ndërsa autoritetet theksojnë nevojën për të forcuar lidhjet me tregun evropian për shkak të pasigurisë ekonomike globale.